【自助餐放蛇起底组】$78酒店 抹茶 + 蜜糖 甜品自助餐

抹茶 甜品固然吸引，但食甜品闲闲地都几廿蚊一款，想食多几款都真係几肉赤！今次带大家嚟到沙田嘅一间酒店，$78加一就可以任食两个半钟甜品，抵食！呢间酒店之前已经推出过紫薯甜品下午茶自助餐，唔少紫薯迷都嚟咗朝圣，最近酒店转咗新主题，变咗抹茶加蜜糖，啱哂抹茶Fans！甜品总共有十几款，当中抹茶类大约佔一半，蜜糖就相对较少，甜品仲会不时更换，食足两个钟都唔会闷！

抹茶类甜品 多数「得只色」

虽然今次自助餐主题係「 抹茶 」，但餐厅入面甜品嘅名都係写「绿茶乜乜乜」，搞到人都乱埋。不过算啦，唔理佢用咩名，味道最紧要！抹茶甜品虽然都有五、六款，但其实大部分都係「只见其色、不觉其味」——即係见到有绿色，但食落係冇抹茶味。当中最吸引嘅就一定係绿茶心太软，即刻整起热辣辣！另外仲有绿茶芝士蛋糕、泡芙等，如果想食Poster上面嘅抹茶马卡龙山，就要早啲去到啦，因为食完就无㗎啦！

蜜糖甜品 拔丝炸芝士蛋糕有惊喜

蜜糖甜品嘅数量相对较少，当中有天使蛋糕、燕窝蜜糖布甸等。另外仲有炸芝士饼，新鲜炸起，仲有职员入嚟提醒我地出去拎，够哂贴心，不过蜜糖嘅吸引力相对无咁大。

「自製窝夫」饱肚 柚子芝士蛋糕清新

除咗抹茶同蜜糖嘅甜品，亦会有其他甜品提供。当中有部窝夫机喺度，可以整窝夫，不过窝夫係有职员负责整，所谓嘅自製只係自己加酱料。虽然有职员整，但手势认真麻麻，窝夫无论样定味道都一般般。

整体甜品质素一般般，而且大部分甜品都偏甜，不过胜在够平而且可以食足两个半钟，而且环境舒服，同朋友嚟食住甜品倾下计都唔错。另外甜品亦会不定时更换，唔怕会闷，唔错。职员亦会主动通知我地出面有啲咩新甜品出咗，几贴心，服务几好。

分数：6.5/10

One + One Bar

电话：2694 3869

地址：沙田白鹤汀街8号帝都酒店大堂

$78下午茶时段：星期一至五 2.30pm – 5pm

备注：要加一